CAMPIONATO DE EUROPA SUB-17 DE HALTEROFILIA
Na cidade grega de Salónica celebran estes días os Campionatos de Europa sub-17. Para o evento foi seleccionada a deportista do Club Halterofilia Coruña, Digna Silo Mangue.
Sábado 22 foi a quenda de Digna, quen competiu na categoría de peso corporal de 81 quilos.
A nosa deportista, subcampioa de Europa na categoría sub-15 o ano pasado, nesta tempada ascendeu unha categoría de idade e tócalle competir entre as súas rivais de 17 anos. Tivo unha boa actuación na modalidade de arrancada. Realizou todos os seus tres intentos válidos, levantou 81 quilos que supón marca persoal para ela e conseguiu o cuarto posto detrás da polaca Machniewska (86 quilos), a turca Pehlivan (83) e a rumana Cismanescu (82).
Na modalidade de dous tempos os xuíces tomaron protagonismo nos seus dous primeiros intentos aparentemente válidos, anulando ambos tras levantar Digna os 93 quilos. Ao terceiro déronlle válido e eses 93 quilos clasificaron a nosa deportista no sexto posto da modalidade, e no quinto do Total Olímpico cos 174 que dan a suma das marcas conseguidas en arrancada e dous tempos.
O podio de dous tempos foi Pehlivan (109), Machniewska (108) e a turca Sevim (106).
No total olímpico Machniewska (194), Pehlivan (192) e Sevim (185).
