CAMPIONATO DE EUROPA ABSOLUTO DE HALTEROFILIA
En Chisinau, Moldavia, estanse a celebrar estes días os Campionatos de Europa de Halterofilia. O día 16 tocoulle a quenda a dous representantes do CH Coruña: Víctor Castro na categoría de peso corporal de -67 quilos e Irene Martínez na de -59 quilos.
Primeiro competiu Irene, no grupo B da súa categoría. Na modalidade de arrancada realizou o seu peso inicial de 83 quilos co seu terceiro intento, o que a clasificou no 11.º posto da modalidade. En dous tempos levantou 97 quilos co seu primeiro intento, o que lle valeu o 17.º posto, finalizando 13.ª no Total Olímpico con 180 quilos.
Máis sorte tivo Víctor, quen competindo no grupo A logrou realizar dous intentos válidos en ambas as modalidades, levantando 127 en Arrancada, 150 en dous tempos e 277 no Total Olímpico cumprindo na clasificación os seus obxectivos previos ao campionato, o de entrar no top 10.
As súas clasificacións foron 5.º en arrancada, 8.º en dous tempos e 8.º no total olímpico. Estas son as mellores clasificacións que conseguiu nun campionato de Europa Absoluto durante a súa dilatada carreira deportiva.
